Shirkaan waxaa ka qeyb galay Wasiirka Kalluumeysiga iyo Kheyraatka Badda C/Raxmaan Maxamed Cali Xaashi iyo mas’uuliyiin kale.

Ujeedka ayaa ahaa in lagu falanqeeyo sida looga faaiideysan karo Kheyraadka Badda Soomaaliya, iyo raadinta Maalgashadayaal.

Wasiirka Kalluumeysiga Soomaaliya oo Warbaahinta kula hadlay Magaalada Nairobi ee Caasimadda Kenya ayaa sheegay in heshiiskii Xukuumadda Federaalka iyo Dowlad Goboleedyada lagu saleyn doono ka faaiideysiga Kheyraatka Badda.

Waxa uu bogaadiyay in la helo Shirkado buuxiya shuruucda dalka, si labada dhinac ay faaiidooyin ugu helaan Dakhliga kasoo baxa Kheyraatka.

 

Dowladda Federaalka iyo Maamul Goboleedyada oo lagu daray Maamulka Gobolka Banaadir ayaa ku heshiiyay in lacagaha kasoo baxo Bixinta Ruqsadaha Shirkadaha loo siinayo Kalluumeysiga Badda.

Dakhliga kasoo baxa lagu rido Qasnadda Wasaaradda Maaliyadda Xukuumadda Federaalka Soomaaliya si loogu sameeyo ama loogu qabto adeegsiyada Bulshada sida dhismaha Wadooyinka iyo hirgelinta Mashaariic.