Dowladaha sida kulul uga hadlay qarixii khasaaraha badan dhaliyay ee shalay Galab ka dhacay Muqdisho ayaa waa ay kala yihiin Britain, Sucuudiga iyo Imaaraadka Carabta,waxa ayna dhammaantood sheegeen in ay aad uga xun yihiin khasaaraha uu u geystay dadka rayidka ahaa.

Safiirka Dowladda Britain u fadhiya Dalka Soomaaliya, David Concar, ayaa sheegay in uu cabaareynayo qaraxaas,oo uu sheegay in aysan wax waanagsan aheyn leynta dadka radidka ah ee aan waxba galabsan.

Dhamaman Waxaa uu tacsi u diray ehelada iyo asxaabta dadkoodii ku waayay qaraxaas,isaga oo sheegay in Britain ay siiwadi doonto taageerada ay siiso Soomaaliya.

War qoraal ah oo ay soo saartay Wasaaradda arrimaha dibadda ee Sucuudi Carabiya ayaa lagu sheegay in Xukuumadda Riyadh ay si weyn uga xuntahay falkaasi qaraxa ah oo geystay qasaare isugu jira dhimasho iyo dhaawac soo gaaray dad rayid ah.

Boqortooyada Sucuudiga ayaa sheegtay in ay xoojinayso taageerada Dowladda Soomaaliya, islamarkaana ay dowr ka qaadanayso sidii loola dagaallami lahaa Alshabaab.

War saxaafadeed ka soo baxay Wasaaradda Arrimaha Dibadda iyo Iskaashiga Caalamiga ah ee Imaaraadka Carabta, ayaa lagu dhaleeceeyay qaraxii shalay ka dhacay Muqdisho.

Warkan qoraalka ah oo ay soo saartay Dowlada Imaaraadka Carabta ayaa ku sheegtay in falkani uu muujinayo sida Alshabaab ay u yihiin cadowga shacabka Soomaaliyeed, loona baahanyahay in la xoojiyo dagaalka ka dhanka ah Alshabaab sida hadalka loo dhigay.