Magaalada Muqdisho waxaa ka furmay shir ay isugu imaadeen dhamaan Taliyayaasha kala duwan ee howlgalka Midowga Afrika.

Shirkan oo soconaya muddo afar maalmood ah ayaa shalay ka furmay Magaalada Muqdisho,waxaana diiradda lagu saarayaa qorshaha bixitaanka Ciidanka AMISOM.

Simon Mulongo, oo ah ku xigeenka Wakiilka Midowga Afrika ee AMISOM, ayaa sheegay in qorshaha shirkan lagu lafa gurayo ay ka midyihiin howlaha la qabanayo ka hor inta aysan AMISOM ka bixin dalka, sida ugu wanaagsan ee uu ku dhici karo qorshaha kala guurka ee amniga Soomaaliya loogu wareejinayo Ciidanka dowladda Soomaaliya iyo qodobo kale.

Isaga oo la hadlayay Taliyayaasha ayuu ka codsaday in afartaas maalmood ay ku soo saaraan qorshe macquul ah, la isku halleyn karo islamarkaana aan dib u dhac ku keeneyn guulaha laga gaaray dagaalka ka dhanka ah Al-shabaab.

Qorshahan waxaa qeyb ka ah bixtaanka kun ka mid ah Ciidanka Burundi oo 28ka Bishan ka baxaya AMISOM, taas oo waafaqsan qaraarkii Golaha amaanka ee Qaramada Midoobey ee soo baxay July 2018.

AMISOM waxaa ay sheegtay in ay dooneyso in Ciidankeeda Soomaaliya uu la ekaado 20,626 oo Askari meesha lagu gaaro 28ka February ee sanadkan,qorshahaan oo aan dib u dhac lahayn.